Minggu, 10 Januari 2016

Ba-blog ulang

Jadi kapan malam itu kita lagi dudu-dudu deng sahib-sahib. Lagi sementara katawa karna lagi menonton stand up comedy-nya Mongol di yutub, eh tiba-tiba sahib satu babilang, "nga pe isi postingan cuma yang judul "Kue Putu" ini, mana lagi postingan laeng? Blogger kok!". Sahib satu langsung basambung, "iyo, buang kasana itu Thank God Im Blogger kalo so te ba posting-posting lagi". Waktu itu, cuma bisa katawa katawa kacili. Padahal, hati tasontong.

Pengaruh tasontong di hati, jadi biar so sampe rumah, itu dorang dua pe kata-kata tadi jadi tatempel trus di tlinga. So butul yang dorang bilang itu. Langsung otomatis dapa inga awal-awal kita bekeng ini blog. Langsung tabayang noh susahnya bacari tutorial untuk otak-atik blog biar dapa liat zen. Dapa inga cari cara biar bisa ini blog jadi dot com. Dapa inga waktu susahnya mo suka ada iklan di blog. Pokonya, dapa inga smua.

Lalu, kita masih kerja jadi penjaga warnet. Otomatis, bisa rasa internet yang depe laju zen. Soalnya, dulu di rumah kalau mo bainternet cuma bisa pake modem CDMA. Yang tiap bulan bayar 50 ribu. Dengan depe laju internet yang lumayan. Lumayan bisa balatih sabar. Baputar video yutub yang depe durasi 7 menit saja, dulu itu musti bajangkar di muka layar komputer bisa sampe 1 jam. Sekarang, so pake indi hom. Baputar yutub te pake bafering, eh malah jarang ba blog. Jadi dapa rasa macam orang yang pas pedekate kiamet depe batempel, tapi pas so pacaran ba ilang ilang trus.

Dapa inga lalu niat kalo so pake hape yang zen depe kamera, so mo rajin bablog yang isinya foto-foto yang masih bisa dibedakan mana idong mana mulu mana bulu idong. Eh, sekarang so pake hape yang depe lensa bisa kasi hasil gambar yang jernih, eh malah te pernah bablog.

Sekarang amper semua hal yang jadi kendala waktu lalu so bisa dipunya. Blog so lumayanlah depe hasil otak-atik, so jadi dot com, so ada juga depe iklan, follower blog juga ada, tagabung juga di komunitas blogger yang zen. Internet di rumah juga biar amper setengah juta dia isap tiap bulan, tapi so baku tutup deng depe laju kalo mo bandingkan deng yang lalu. Jadi, memang sebenarnya so talalu skali kalo sampe te fokus bablog ulang. So macam jadi dosa basar begitu dang.

Oke, mulai sekarang so musti rajin bekeng postingan. Kita tau ini so ulang-ulang kita bilang di postingan. Kong tetap juga depe ujung-ujung itu postingan yang diketik cuma ta mengendap di draft. Cuma tetap kita musti bilang. Ini so macam jadi janji. Dan, laki-laki sejati slalu batepati depe janji.

Padahal so banyak kejadian menarik alias zen yang kita alami. Kayak waktu itu, pernah ada perjalanan ke Padamarari. Terus waktu itu juga pernah jadi semacam bintang tamu di acara launching novel. Di situ juga kita mo niatkan batembak harim. Cuma apa daya, talalu panjang di intro, akhirnya dapa sikon yang te mendukung. Batembak langsungnya jadi gagal total. Kan? Ini kan bisa kita bekeng jadi bahan postingan. Blogger kok! Harusnya samua yang ada di skitarnya bisa jadi sumber tulisannya.

Terima kasih untuk dua orang kita pe sahib, Husein deng Acid. Karna kamu pe kata-kata kita jadi mo "taubat". Jadi mo bayar kita pe "dosa-dosa". Kong, bajanji te mo bekeng "dosa" baru lagi. Supaya bisa bangga ulang pake itu kaos Thank God Im Blogger. Yah, minimal satu kali satu minggu lah kita baposting.

Oke, ini postingan pertamanya kita di 2016. Kalo ngana te mengerti dengan apa yang kita bilang ini, jang ba pantoa. Kan ada kolom komentar. Batanya. Nanti kita jawab.

1 komentar:

  1. Komentar ini telah dihapus oleh administrator blog.

    BalasHapus

Related Posts Plugin for WordPress, Blogger...